MIRISHKOR TUMAN HOKIMLIGI VA MUTASADDILAR NAZARIDAN CHETDA QOLAYOTGAN CHAYLA

142

Mirishkor tumanining eng chekka hududlariga borganmisiz? Koʻp millatli xalq bilan muloqot qurganmisiz? Ularni qiynab kelayotgan  yillik muammolarga yechim topishga harakat qilib koʻrganmisiz?

Dastlab bu savollarni Mirishkor Tuman hokimligiga emas, balki Qashqadaryo viloyatiga kelgan ishchi guruhlarga, ijtimoiy tarmoqlarda oʻzini reklama qilayotgan “katta – katta” deputatlarga bermoqchimiz?

Ana shunday keskin savollarni berishga asosimiz ham bor. Gap shundaki, mazkur tumandagi “Qumbangi” MFYda istiqomat qiluvchi Ma’rifat Xoʻjaniyozova sizning “beminnat” yordamingizga muhtoj.

Qanday yordam deysizmi? Unda suratlarga nazar tashlang!
Ma’rifat Xoʻjaniyozova va uning turmush oʻrtog’i  hamda qaynotasi mana bir necha yildirki ushbu pastqam, istiqomat qilishga yaroqsiz xonadonda (toʻg’rirog’i chaylada) yashab kelmoqda. Hozirda ishsiz qiynalayotgan oila bir necha bor Xalq qabulxonasiga murojaat etgan. Tuman hokimligiga borgan.Lekin biror bir natija yoʻq. Dardini tinglamagan mutasaddilardan umidini uzgan Ma’rifat opa ayol boshi bilan shu kunlarda uy koʻtarish uchun g’isht qoʻymoqchiligini aytadi.

-Oʻtgan yili qishda yashashga juda qiynaldik. Uyimizning tom qismidan chakki oʻtib, hamma joy suvga toʻlardi. Har kuni uydan chelak-chelak suv olib chiqardim. Mayli bunga ham chidadik, biroq bahor boshlanishi bilan g’isht qoʻyib, endi uy qura boshlagan edik ,qurilish deb koʻtarmoqchi boʻlgan uyimizni buzib tashlashdi. Oʻrniga kichik yoʻl qurildi.

-Yoz oylari undan ham yomon keldi.Pastqam chayladan tez-tez ilon chiqa boshladi. Qoʻrqsam ham turmush oʻrtog’im bilan shu ilonlarni oʻldirib tashladik. Farzandimni chaqib olmasin deb hozirda onamning uyiga qoʻyib kelganman. Bu yil qishgacha mahalla raisi yordami bilan yana g’isht qoʻyib uy qurmoqchimiz.
Ma’rifat Xoʻjaniyozova bankdan kredit olib tadbirkorlik qilishga  urinib koʻrdi. Ammo unga kredit berilmadi.Ishchi guruh kelib yashash tarzini ham oʻrganib ketishgan. Qop-qop va’dalar berilgan. Buni qarangki, biror va’da bajarilmadi. Bugun qulayman deb turgan uyni qayta qurishga nahotki Mirishkor tuman hokimligi yordam qoʻlini choʻza olmasa? Oʻzi hokimiyat vakillari nima ish qilayapti? Yoki keraksiz hujjatlarni nomiga toʻldirish, hech kim koʻrmaydigan hisobotlar bilan ovvora boʻlishmoqdami?
E’tirozimiz haqli. Barcha tuman va shaharlarda har sohada oʻsish rivojlanish kuzatilayotganda, odamlar turmush-tarzi darajasi yaxshilanayotganda nahotki Mirishkor oqsasa? Qishloq xoʻjaligi sohasida tuman doim yetakchilikda-ku.Yoki Odamlar roziligini olish, imkoniyati cheklanganlarga yordam koʻrsatishda yetakchilik qiyinmi? Axir Prezidentimizning bugun rahbarlar zimmasiga qoʻygan asosiy talabi shu emasmi?

“ Har bir oila tadbirkor” dasturi asosida amalga oshirilishi lozim boʻlgan ishlarni ham tumanda qoniqarli deb boʻlmaydi. Buning natijasida ishsizlar soni kun sayin oshib borayapti.

“ Obod qishloq” dasturi asosida Mirishkorda joriy yilning may oyida Pomuq massivi va Chandir qishlog’ida keng koʻlamli ishlar boshlangan edi. Biroq oradan vaqt oʻtgach Pomuqda dastur ijrosi toʻxtab qoldi, nazarimizda. Bunday deyishga asosimiz ham bor.Dastlab qishloqda zamonaviy shifoxona barpo etilgan boʻlsa, bundan aholining quvonchi cheksiz edi. Lekin Pomuq faqatgina shifoxana bilan cheklandi, qoldi. Nosoz yoʻl masalasi, bolalar bog’chasi, suv muammosi,  sanasak sanog’i koʻp bu ishlar qachon bajariladi?

Mirishkorda Ma’rifat Xoʻjaniyozova kabi kam ta’minlangan, yordamga muhtoj, chaylada yashaydigan oilalar anchagina.

Hurmatli mutasaddilar bizning va sizning vazifangiz ana shunday ehtiyojmand oilalarga yordam qoʻlini choʻzish, ularning yashash tarzini yaxshilashdan iborat. Axir mamlakatimizda xalq davlat idoralariga emas, davlat idoralari xalqimizga xizmat qilishi kerakligini unutmaslik lozim.

Mavzuga doir: Prezident Shavkat Mirziyoyevning Qashqadaryo viloyatiga tashriflari davomidagi nutqidan “Har bir murojaat hal etilishi, adolat ta`minlanayotganini odamlar sezishi kerak.”

Dilshod NABIYEV

Javob qoldiring:

Please enter your comment!
Please enter your name here