Қашқадарёлик ҳоким ва сектор раҳбарлари ўқув-семинарда иштирок этишмоқда

Унда вазирлик ва идора масъуллари, Қорақалпоғистон Республикаси, Хоразм вилояти, Сурхондарё, Қашқадарё вилоятлари сектор раҳбарлари (жами250 нафар) қатнашмоқда

Мазкур ўқув-амалий семинар Ўзбекистон Республикаси Президенти ҳузуридаги Давлат бошқаруви академиясида белгиланган дастурга мувофиқ тўрт вилоятнинг туман, шаҳарларидаги сектор раҳбарлари (ҳоким, прокурор, ички ишлар бўлими ҳамда солиқ инспекцияси бошлиқлари)нинг аҳоли муаммоларини аниқлаш ва ҳал этиш тизимининг самарали ишлашини таъминлаш бўйича билим ва кўникмаларини ривожлантириш мақсадида ташкил этилган.

Ўқув-амалий семинарни Ўзбекистон Республикаси Президентининг кадрлар сиёсати масалалари бўйича маслаҳатчиси Ғофуржон Мирзаев кириш сўзи билан очиб берди.Шунингдек, семинар аввалида Олий Мажлис Сенати раиси Танзила Нарбаева, Қонунчилик палатаси спикери Нуриддин Исмоиловлар сўз олиб, давлатимиз раҳбари томонидан 2024 йил 18-20 ноябрь кунлари Олий Мажлис Қонунчилик палатаси ва Сенатининг мажлисларида белгилаб берилган устувор вазифаларга мувофиқ "маҳалла еттилиги" фаолиятини янги механизм асосида йўлга қўйиш, жойларда "Камбағалликдан фаровонлик сари" дастури доирасида амалга оширилаётган ишларни янада жадаллаштириш, маҳаллабай ишлашга масъул раҳбарлар фаолиятини самарали ва ўзаро ҳамкорликда ташкил этиш ҳамда уларда зарур билим, кўникмаларни шакллантиришда бугунги семинарнинг аҳамияти хусусида тўхталдилар.
Шундан сўнг тингловчилар — ижро органлари масъуллари ҳудудларимизда аҳоли муаммоларини аниқлаш ва ҳал этишда ўзлари дуч келаётган масалаларни ечиш юзасидан таклиф ва мулоҳазаларини билдирдилар.

Семинарда ҳудудларни иқтисодий ривожлантириш ва аҳоли бандлигини таъминлаш, “Камбағалликдан фаровонлик сари” дастурини амалга ошириш, инвестиция, экспорт ва маҳаллийлаштиришда устувор масалалар, миграция жараёнларини тартибга солиш, янги тартибга кўра ер ажратиш, маҳаллалардаги бўш объектлардан самарали фойдаланиш ва кадастр ҳужжатларини расмийлаштириш ҳамда йўл бўйи ҳудудларда инфратузилмани яхшилаш, Аҳолини уй-жой билан таъминлаш, шаҳарсозлик, атроф-муҳитни асраш, ислоҳотларнинг ҳудудлардаги самарадорлигини ҳамда мансабдор шахслар фаолиятида қонун устуворлигини таъминлаш, шу ва бошқа долзарб мавзуларда вазирлик ва идора раҳбарлари, соҳа мутахассислари томонидан мулоқот шаклида маърузалар ташкил этилмоқда.

Ўртага ташланган мазкур масалалар юзасидан ечимлар ишлаб чиқиш бугунги семинарнинг асосий ва муҳим жиҳатларидан биридир.