Қашқадарёда АИ-80 маркали сифатсиз автобензин сотилиш ҳолатлари аниқланди

Аҳолини сифатли нефт маҳсулотлари билан узлуксиз таъминлаш чора-тадбирлари юзасидан “Ўзенергоинспексия” томонидан Қашқадарё вилоятида ўтказилган назорат тадбирларида АЁҚШларда қоидабузарлик ҳолатлари аниқланмоқда.

Хусусан, Қарши тумани "Ровот" МФЙдаги "К.А.О." МЧЖГА қарашли автомобилларга ёқилғи қуйиш шохобчасида сотилаётган автобензиндан намуна олиниб, лаборатория таҳлилларидан ўтказилганда АИ-92-маркали автобензин давлат стандарт талабларига мос келмаслиги (сифатсиз) маълум бўлди.

Бу каби ҳолат Нишон туманидаги "Г.Т.Г.С." МЧЖ ҳамда Қарши шаҳри ва туманидаги "Х-С.Г." МЧЖ ҳамда “Н.П.” ва "М.С.Г." хусусий корхоналарига қарашли автомобилларга ёқилғи қуйиш шохобчаларида сотилаётган автобензиндан намуна олиниб, лаборатория таҳлилларидан ўтказилганда АИ-80-маркали автобензин давлат стандарт талабларига мос келмаслиги (сифатсиз) маълум бўлди.

Мазкур ҳолатлар юзасидан қоидабузарликка йўл қўйган ушбу АЁҚШларда биржа савдоларида иштирок этиши вақтинча тўхтатилган.