Муротжон Азимов Қарши, Касби ва Нишон туманларига бориб танқидий йиғилиш ўтказди

Бугун вилоят ҳокими Муротжон Азимов Қарши, Касби ва Нишон туманларига ташриф буюриб, қишлоқ хўжалиги масъуллари ва ҳудуд фермерлари иштирокида соҳада йўл қўйилаётган камчиликлар юзасидан танқидий-таҳлилий йиғилиш ўтказди.

Вилоят ҳокими ўз чиқишида, бу соҳада инновациялар ва замонавий технологияларни жорий қилиш, агросаноат комплексини ривожлантиришнинг аҳамиятига алоҳида тўхталиб ўтди. Шунингдек, қишлоқ хўжалигини модернизация қилиш, имтиёзли кридет маблағларини ўз вақтида сўндириш, ердан самарали фойдаланиш, ҳосилдорликни ошириш, суғориш тизимини яхшилаш ва соҳага рақамли технологияларни жорий этишда камчиликларга йўл қўйган масъуллар жиддий огоҳлантирилди.

Учрашув давомида қишлоқ хўжалиги соҳасида олиб борилаётган ислоҳотлар, мавжуд шароит ва яратилаётган имкониятлар хусусида фикр юритилиб, вилоят ҳокими туман масъулларининг таклиф ва муаммоларини тинглаб, уларнинг самарали меҳнат қилиши учун давлатимиз раҳбари томонидан барча зарур шарт-шароитлар яратиб берилаётганлигини таъкидлади.

Шунингдек, ғалла экиш ишларини самарали ва тизимли ташкил этиш, ҳосилдорликни ошириш, ариқ ва зовурларни тозалаш, меҳнат жараёнида илғор технологиялардан кенг фойдаланиш бўйича масъулларга аниқ топшириқлар берилди.

Ушбу мулоқотда вилоят прокурори Бектош Сайипов, туман раҳбарлари ва уларнинг ўринбосарлар, тижорат банклари раҳбарлари ҳам иштирок этишди.