Qarshi shahridagi koʻp qavatli uyda 4 mlrd soʻmlik tabiiy gazdan noqonuniy foydalanish holati aniqlandi

“Hududgaztaʼminot” AJ boshqaruv raisining tegishli topshirigʻi bilan tabiiy gazdan noqonuniy foydalanish holatlarini aniqlash va ularni oldini olishga qaratilgan nazorat tadbirlari davom ettirilmoqda. Shunday tadbirlardan biri “Hududgaz Qashqadaryo” gaz taʼminoti filiali komplayens nazorat tuzilmalari, shahar gaz taʼminoti boʻlimi xodimlari, Oʻzenergoinspeksiya va huquq-tartibot organlari hamkorligida Qashqadaryo viloyati Qarshi shahrida oʻtkazildi.

Shaharning “Paxtazor” mitti tumanidagi “M. Sh. Q. S.” MCHJga qarashli koʻp qavatli turar-joy binosi xatlovdan oʻtkazilganda, taʼminot korxonasi bilan shartnoma tuzmasdan va loyiha hujjatlari rasmiylashtirmasdan tarmoqqa toʻgʻridan toʻgʻri ulangan holda tabiiy gazdan noqonuniy foydalanib kelinayotgani aniqlandi.

Holat yuzasidan dalolatnoma tuzilib, dastlabki hisob-kitoblarga koʻra 4 milliard 90 million 141 ming soʻm zarar aniqlandi. Barcha materiallar huquq-tartibot organlariga yuborildi.