"От изини той босар". Ота-бола ҳайдовчилар 54 та қоидабузарлик содир этди

Мажбурий ижро бюроси органлари томонидан Ички ишлар вазирлигининг Давлат йўл ҳаракати хавфсизлиги хизмати билан ҳамкорликда йўл ҳаракати қоидалари бузилгани учун қўлланилган маъмурий жарималарни ундириш борасида тизимли ишлар амалга ошириб келинмоқда.

Жумладан, яккабоғлик А.М ўзига тегишли бўлган “Nexia3” русумли автотранспорт воситаси билан 33 маротаба, отаси Т.Й “Gentra” автомашинаси билан 21 маротаба турли кўринишдаги қоидабузарликлар содир этган ва жарималарни тўламасдан келган. Натижада,  “Nexia3” автомашинасида 16.5 млн сўм, “Gentra” автомашинасида 7.3 млн сўм қарздорлик юзасига келган.

Мажбурий ижро бюросининг Яккабоғ туман бўлими томонидан олиб борилган ижро ҳаракатлари натижасида мазкур иккита автотранспорт воситаси ҳам топилиб, хатланди. 

Келгусида, қарздорлик тўлаб берилмаган тақдирда, ушбу автотранспорт воситаларини онлайн-аукцион савдоларига чиқариш чоралари кўрилади.