Murotjon Azimov boshchiligidagi Qashqadaryo delegatsiyasi Germaniyaga tashrif buyurdi

Bugungi kunda vohamiz Germaniya davlati bilan ta’lim, tartibli migratsiya, tibbiyot, investitsiya va sun’iy intellekt kabi qator yo‘nalishlarda hamkorlikni yo‘lga qo‘ymoqda.

Hozirda ushbu davlatda rasmiy tashrif bilan bo‘lib turgan viloyat hokimi Murotjon Azimov boshchiligidagi delegatsiyamiz ham ko‘plab loyihalarni hamkorlikda amalga oshirish, yoshlarimizni kasb-hunarga o‘rgatish, ish o‘rinlari yaratish va tartibli migratsiyani amalga oshirgan holda ham iqtisodiyotimiz rivojiga, ham aholi daromadlarini oshirilishiga xizmat qiladigan muloqotlarni o‘tkazishmoqda. 

Jumladan, Haydelberg (Heidelberg) shahri meri janob Ekkart Vursner (Eckart Würzner) bilan o‘tkazilgan uchrashuvda ta’lim va kasbiy ta’lim, sog‘liqni saqlash, investitsiyalarni jalb etish hamda tartibli migratsiya yo‘nalishlarida uzoq muddatli va barqaror hamkorlikni yo‘lga qo‘yish masalalari yuzasidan muzokaralar olib borildi. Muzokaralar yakunida tomonlar o‘rtasida qator muhim kelishuvlar imzolandi.

Ushbu shahar asrlar davomida Yevropa ilm-fani, ta’lim va madaniyat taraqqiyotining muhim markazi bo‘lib kelmoqda. Haydelberg universiteti, Yevropa molekulyar biologiya laboratoriyasi, Nemis kanser tadqiqot markazi, Maks Plank institutlari shaharni global ilmiy-tadqiqot va innovatsiya markaziga aylantirgan. 

Ma’lumot uchun, Markaziy Osiyodagi ilk nemis bog‘chasi ham Qashqadaroda ochilgan.