Kadastr bo‘limi boshlig‘ining noqonuniy harakatlariga chek qo‘yildi

Davlat xavfsizlik xizmati hamda Iqtisodiy jinoyatlarga qarshi kurashish departamenti tomonidan o‘tkazilgan tezkor tadbirda Kadastr agentligining Qashqadaryo viloyatidagi tumanlardan birining bo‘lim boshlig‘ining noqonuniy harakatlariga chek qo‘yildi.

Aniqlanishicha, mansabdor shaxs mahalliy fuqaroga issiqxona qurish uchun ajratilgan 50 sotix sug‘oriladigan yer maydoni bo‘yicha kadastr hujjatlarini boshqa shaxs nomiga rasmiylashtirib, uni sotib olib berishni va’da qilib, oldindan 11 600 AQSH dollari olgan.

Biroq u bergan va’dasini bajarmagan hamda olgan pullarining bir qismi hisobidan 49,7 mln so‘mni qaytarayotgan vaqtida uning noqonuniy harakatlari fosh etilgan.

Tergovga qadar tekshiruv davomida mansabdor shaxs 11 600 AQSH dollari hisobidan qolgan 89,5 mln so‘mni ham jabrlanuvchiga qaytarib bergan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.