"Насаф" Ўзбекистон кубоги финалига йўлланмани қўлга киритди

Ўзбекистон Cоcа-Cоlа кубоги ярим финалининг биринчи баҳсига Қарши шаҳри мезбонлик қилди. Бунда "Насаф" Олмалиқнинг АГМК клубини қабул қилди.

Учрашувнинг биринчи бўлими тан олиш керакки, тўлиқ тенг курашлар остида кечди. Бўлим мобайнида гоҳ у жамоа, гоҳ бу жамоа тўп назоратини қўлга олди. Баҳснинг 37-дақиқасида АГМКнинг эронлик футболчиси Сияваш Ҳақназарий ҳимоячиларнинг суст ўйинидан фойдаланиб ўйинда ҳисобни очди. Бўлимга қўшиб берилган 45+3 дақиқада "Насаф" футболчиси Ғолиб Ғайбуллаев жамоаси мағлуб сифатида майдондан чиқиб кетмаслигини таъминлайдиган голни киритди. 1:1

Иккинчи бўлимда ҳам жамоалар ярим финалга яраша ўйин кўрсатишга ҳаракат қилишди. Қайсидир маънода буни уддасидан чиқишди ҳам. Тўп бўйича устунлик бу бўлимда ҳам маълум бир жамоада бўлди дейиш қийин. "Насаф" бўлимнинг ўрталарига келиб ташаббусни ўзи томонга оғдира олди ва Акмал Мозговойнинг юқоридан етказиб берган тўпни Алибек Давронов 60-дақиқада голга айлантирди. Баҳсда жамоалар қанча ҳаракат қилишмасин ҳисоб бошқа ўзгармади ва "Насаф" ўзи учун муҳим бўлган ғалабани қўлга киритди.

Шундай қилиб, "Насаф" Бухорода бўлиб ўтадиган финалга биринчи йўлланмани қўлга киритди. Иккинчи финалчи эса эртага "Навбаҳор" ҳамда "Сўғдиёна" ўртасидаги ўйиндан сўнг аниқ бўлади.

Қашқадарёлик футбол мухлисларини финал билан табриклаймиз!

Шерзод Туракулов.